రాష్ట్రాన్ని కుదిపేస్తున్న మైక్రో ఫైనాన్స్ స్కామ్ దర్యాప్తులో రోజుకో కొత్త విషయం బయటపడుతోంది. ఈ కేసులో పోలీసులు తాజాగా కొన్ని కీలక ఆధారాలు సేకరించినట్లు సమాచారం.
ప్రముఖ జానపద గాయని మంగ్లీ సోదరుడు శివ చౌహాన్ ఖాతా లావాదేవీలపై సైబరాబాద్ పోలీసులు దృష్టి సారించారు. ప్రధాన నిందితుడిగా ఉన్న రమావత్ మధు అకౌంట్ నుంచి శివ చౌహాన్ ఖాతాకు డబ్బులు బదిలీ అయినట్లు బ్యాంక్ స్టేట్మెంట్ల ద్వారా గుర్తించారు.
పోలీసుల ప్రాథమిక దర్యాప్తు ప్రకారం.. రమావత్ మధు మూడు విడతల్లో నగదు పంపినట్లు తేలింది. అయితే ఆ డబ్బులు ఖాతాలో జమ అయిన వెంటనే, మరుసటి రోజే నగదు ఉపసంహరణ జరిగినట్లు విచారణలో బయటపడింది.
పక్కా ఆధారాల కోసం సైబరాబాద్ పోలీసులు సంబంధిత బ్యాంకులకు లేఖలు రాశారు. ఇప్పటికే ప్రధాన నిందితుడి అకౌంట్ను సీజ్ చేసిన అధికారులు, పూర్తి ట్రాన్సాక్షన్ వివరాలను సమర్పించాలని ఆదేశించారు.
మధుతో పాటు హిమకాంత్ రెడ్డి, శివ చౌహాన్ ఖాతాల లావాదేవీలపై కూడా విచారణ కొనసాగుతోంది.
ఈ కేసుతో తమకు ఎలాంటి సంబంధం లేదని మంగ్లీ, ఆమె సోదరుడు ఇప్పటికే స్పష్టం చేశారు. అయితే నిందితుడి ఖాతా నుంచి డబ్బులు బదిలీ అయినట్లు గుర్తించడంతో, కేసు మరింత మలుపు తిరిగింది.
మైక్రో ఫైనాన్స్ పేరుతో సేకరించిన డబ్బు ఎక్కడికి వెళ్లింది? దీని వెనుక ఇంకా ఎవరెవరు ఉన్నారు? అనే కోణంలో పోలీసులు లోతుగా దర్యాప్తు చేస్తున్నారు. ఈ నేపథ్యంలో మరిన్ని అరెస్టులు జరిగే అవకాశాలు ఉన్నట్లు తెలుస్తోంది.
మొత్తానికి, ఈ కేసు ఇప్పుడు రాష్ట్రవ్యాప్తంగా పెద్ద చర్చకు దారి తీసింది.
