ఐకాన్ స్టార్ అల్లు అర్జున్ రాజకీయాల్లోకి అడుగుపెట్టబోతున్నారంటూ గత కొన్ని రోజులుగా సోషల్ మీడియాతో పాటు పలు మీడియా వేదికల్లో వార్తలు వైరల్ అవుతున్నాయి. ప్రముఖ రాజకీయ వ్యూహకర్త ప్రశాంత్ కిషోర్తో ఆయన భేటీ అయ్యారనే ప్రచారం కూడా జోరుగా సాగింది. ఈ నేపథ్యంలో అల్లు అర్జున్ రాజకీయ ప్రవేశంపై ఆయన వ్యక్తిగత టీమ్ కీలక ప్రకటన చేసింది.
అల్లు అర్జున్ మేనేజర్ శరత్ చంద్ర నాయుడు స్పందిస్తూ, సోషల్ మీడియాలో వస్తున్న రాజకీయ ఎంట్రీ వార్తల్లో ఎలాంటి నిజం లేదని స్పష్టం చేశారు. అవన్నీ కేవలం ఊహాగానాలు మాత్రమేనని, వాటిని నమ్మాల్సిన అవసరం లేదని తెలిపారు.
ప్రస్తుతం అల్లు అర్జున్ పూర్తిగా తన సినీ కెరీర్పైనే దృష్టి పెట్టారని శరత్ చంద్ర నాయుడు వెల్లడించారు. దేశవ్యాప్తంగా అత్యంత బిజీగా ఉన్న స్టార్ హీరోల్లో అల్లు అర్జున్ ఒకరని, ప్రస్తుతం ఆయన చేతిలో భారీ పాన్ ఇండియా ప్రాజెక్టులు ఉన్నాయని చెప్పారు.
రాబోయే దాదాపు పదేళ్ల పాటు అల్లు అర్జున్ షెడ్యూల్ భారీ సినిమాలతో నిండిపోయి ఉందని, ఇలాంటి కీలక సమయంలో సినిమాలను పక్కనబెట్టి రాజకీయాల్లోకి రావాల్సిన పరిస్థితి లేదని ఆయన వ్యాఖ్యానించారు.
అలాగే మెగాస్టార్ చిరంజీవి లేదా ఇతర రాజకీయ నాయకుల ద్వారా అల్లు అర్జున్ రాజకీయాల్లోకి వస్తారనే ప్రచారంలో కూడా ఎలాంటి వాస్తవం లేదని స్పష్టం చేశారు. ఈ తరహా వార్తలు పూర్తిగా నిరాధారమైనవేనని, అభిమానులు వాటిని నమ్మవద్దని ఆయన కోరారు.
దీంతో గత కొద్ది రోజులుగా సోషల్ మీడియాలో వైరల్ అవుతున్న అల్లు అర్జున్ రాజకీయ ప్రవేశం వార్తలకు ఆయన వ్యక్తిగత టీమ్ అధికారికంగా ఫుల్ స్టాప్ పెట్టినట్లైంది. ప్రస్తుతం అల్లు అర్జున్ తన రాబోయే పాన్ ఇండియా చిత్రాలపైనే పూర్తి దృష్టి సారించినట్లు స్పష్టమైంది.
