ప్రముఖ ఫోక్ సింగర్ మంగ్లీ (సత్యవతి)పై పంజాగుట్ట పోలీసులు క్రిమినల్ కేసు నమోదు చేయడం సంచలనంగా మారింది. మైక్రో ఫైనాన్స్ పేరిట భారీ మొత్తంలో పెట్టుబడి మోసానికి సంబంధించిన ఆరోపణలతో ఈ కేసు నమోదు చేశారు.
ఈ వ్యవహారంలో మంగ్లీతో పాటు ఆమె సోదరుడు శివ, అలాగే విరాటపర్వం దర్శకుడు వేణు ఊడుగుల పేర్లు కూడా కేసులో చేరడం గమనార్హం.
దాదాపు 100 మంది బాధితుల నుంచి అధిక లాభాల ఆశ చూపిస్తూ కోట్ల రూపాయలు సేకరించినట్లు ఆరోపణలు ఉన్నాయి. వ్యాపార పెట్టుబడుల పేరుతో ఈ నిధులు సేకరించారని సమాచారం.
అయితే, ఏళ్ల తరబడి లాభాలు రాకపోవడంతో పాటు అసలు పెట్టుబడిని కూడా తిరిగి ఇవ్వకపోవడంతో బాధితులు న్యాయవాది సుబ్బారావును ఆశ్రయించారు.
బాధితుల తరపున డబ్బులు తిరిగి ఇవ్వాలని న్యాయవాది సుబ్బారావు ప్రశ్నించగా, మంగ్లీ టీమ్ నుంచి బెదిరింపులు వచ్చాయని ఆయన ఆరోపించారు.
మంగ్లీ, ఆమె సోదరుడు శివ, దర్శకుడు వేణు ఊడుగుల కలిసి ఫోన్ చేసి తీవ్రంగా హెచ్చరించారని, రోడ్డు ప్రమాదంలో చంపేస్తామని కూడా బెదిరించారని సుబ్బారావు తన ఫిర్యాదులో పేర్కొన్నారు.
ఈ ఫిర్యాదును సీరియస్గా తీసుకున్న పంజాగుట్ట పోలీసులు BNS సెక్షన్ 351(2), 352 కింద కేసు నమోదు చేసి దర్యాప్తు ప్రారంభించారు.
మంగ్లీకి ఉన్న పాపులారిటీ కారణంగా ఈ కేసు ఇప్పుడు హాట్ టాపిక్గా మారింది. ఈ వ్యవహారంలో నిజంగా పెట్టుబడి మోసం జరిగిందా? లేక మరేదైనా కోణం ఉందా? అనే దిశగా పోలీసులు లోతుగా విచారణ చేపడుతున్నారు.
మొత్తానికి, ఫోక్ సింగర్ మంగ్లీపై నమోదైన ఈ కేసు టాలీవుడ్ మరియు సోషల్ మీడియాలో తీవ్ర చర్చకు దారితీసింది.
