సూపర్ స్టార్ మహేష్ బాబు హీరోగా, దర్శకధీరుడు ఎస్.ఎస్. రాజమౌళి దర్శకత్వంలో తెరకెక్కుతున్న భారీ పాన్ ఇండియా చిత్రం ‘వారణాసి’ పై అభిమానుల్లో భారీ అంచనాలు నెలకొన్నాయి. ప్రస్తుతం ఈ సినిమా షూటింగ్ శరవేగంగా సాగుతుండగా, చిత్రానికి సంబంధించిన ఆసక్తికర విషయాలు ఒక్కొక్కటిగా వెలుగులోకి వస్తున్నాయి.
తాజాగా ప్రముఖ రచయిత విజయేంద్ర ప్రసాద్ ఓ ఇంటర్వ్యూలో ఈ సినిమా గురించి ఆసక్తికర వ్యాఖ్యలు చేశారు. కథలోని కీలక ఘట్టాలు ప్రేక్షకులను ఆశ్చర్యపరుస్తాయని ఆయన తెలిపారు. విజయేంద్ర ప్రసాద్ మాట్లాడుతూ.. సినిమాలో రాముడు, కుంభకర్ణుడు పాత్రల మధ్య సాగే ఘర్షణ ప్రధాన ఆకర్షణగా నిలుస్తుందని చెప్పారు. ముఖ్యంగా వారి మధ్య వచ్చే సుమారు 30 నిమిషాల ఎపిసోడ్ ప్రేక్షకులకు గూస్బంప్స్ తెప్పించేలా ఉంటుందని వెల్లడించారు.
అలాగే షూటింగ్ సమయంలో మహేష్ బాబును ఓ ప్రత్యేక లుక్లో తొలిసారి చూసినప్పుడు తనకు ఎంతో ఉత్సాహం కలిగిందని చెప్పారు. ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. భారీ బడ్జెట్తో రూపొందుతున్న ఈ చిత్రంలో బాలీవుడ్ స్టార్ ప్రియాంక చోప్రా హీరోయిన్గా నటిస్తుండగా, మలయాళ స్టార్ నటుడు పృథ్వీరాజ్ సుకుమారన్ కీలక పాత్రలో కనిపించనున్నారు. ఇప్పటికే ఆయన పాత్రకు సంబంధించిన ఫస్ట్ లుక్ ప్రేక్షకుల దృష్టిని ఆకర్షించింది.
అంతర్జాతీయ స్థాయిలో తెరకెక్కుతున్న ఈ సినిమా కోసం రాజమౌళి అత్యంత ప్రతిష్టాత్మకంగా పనిచేస్తున్నారు. పలు దేశాల్లో షూటింగ్ జరుపుకుంటున్న ఈ చిత్రం, విజువల్ వండర్గా నిలుస్తుందని చిత్ర యూనిట్ ధీమా వ్యక్తం చేస్తోంది. వచ్చే ఏడాది విడుదలకు సిద్ధమవుతున్న ఈ సినిమాపై రోజురోజుకూ అంచనాలు పెరుగుతూనే ఉన్నాయి.
