ఆంధ్రప్రదేశ్ ఉపముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ గురించి ప్రత్యేకంగా చెప్పాల్సిన అవసరం లేదు. సినీ నటుడిగా అపారమైన అభిమానాన్ని సంపాదించుకున్న ఆయన, రాజకీయాల్లోనూ తనదైన ముద్ర వేస్తున్నారు. తాజాగా ఓ కార్యక్రమంలో పాల్గొన్న పవన్ కళ్యాణ్ తన అసలు పేరు, అది ఎలా మారిందనే విషయాన్ని వివరించారు. ఈ సందర్భంగా తన వ్యక్తిగత జీవితానికి సంబంధించిన కొన్ని ఆసక్తికర విషయాలను అభిమానులతో పంచుకున్నారు.
పవన్ కళ్యాణ్ మాట్లాడుతూ.. తన అసలు పేరు ‘శ్రీ కళ్యాణ్ కుమార్’ అని తెలిపారు. అయితే స్కూల్ రికార్డులు, సర్టిఫికెట్లలో తన పేరు నుంచి శ్రీ అనే పదం తొలగిపోయి కె. కళ్యాణ్ కుమార్ గా నమోదైందని చెప్పారు. అనంతరం తనకు మార్షల్ ఆర్ట్స్ శిక్షణ ఇచ్చిన గురువు, తన పేరుకు ముందు ‘పవన్’ అనే పదాన్ని జోడించారని వెల్లడించారు. ఆ తర్వాత నుంచే తన పేరు ‘పవన్ కళ్యాణ్’ గా మారిందని వివరించారు.
సినీ రంగంలోకి వచ్చిన తర్వాత కూడా అదే పేరుతో కొనసాగానని, ప్రస్తుతం అభిమానులు, ప్రజలు కూడా అదే పేరుతో పిలుస్తున్నారని పవన్ కళ్యాణ్ పేర్కొన్నారు. ప్రస్తుతం పవన్ కళ్యాణ్ చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి. ఆయన అసలు పేరు గురించి చాలా మందికి తెలియని విషయాలు బయటకు రావడంతో అభిమానులు ఆసక్తిగా చర్చించుకుంటున్నారు.
