అక్కినేని అఖిల్ హీరోగా, భాగ్యశ్రీ బోర్సే హీరోయిన్గా తెరకెక్కిన ‘లెనిన్’ బాక్సాఫీస్ వద్ద విజయవంతంగా ప్రదర్శితమవుతోంది. మురళీ కిషోర్ అబ్బూరి దర్శకత్వంలో రూపొందిన ఈ చిత్రాన్ని అక్కినేని నాగార్జున, సూర్యదేవర నాగవంశీ నిర్మించగా, ఎస్.ఎస్. తమన్ సంగీతం అందించారు. ముఖ్యంగా ఈ సినిమాకు తమన్ అందించిన బ్యాక్గ్రౌండ్ స్కోర్, పాటలు ప్రేక్షకుల నుంచి మంచి ఆదరణ పొందాయి.
అయితే ప్రస్తుతం కమర్షియల్ సినిమాల్లో ఐటెం సాంగ్లు సాధారణంగా కనిపిస్తున్నప్పటికీ, ‘లెనిన్’ చిత్రంలో అలాంటి పాట లేకపోవడం అభిమానుల్లో ఆసక్తిని కలిగించింది. దీనిపై తాజాగా ఓ ఇంటర్వ్యూలో సంగీత దర్శకుడు తమన్ ఆసక్తికర విషయాలను వెల్లడించారు.
తమన్ మాట్లాడుతూ, ‘లెనిన్’ కోసం తొలుత ఒక స్పెషల్ ఐటెం సాంగ్ను ప్లాన్ చేశామని, ఆ పాటను కూడా పూర్తిగా సిద్ధం చేసినట్లు తెలిపారు. ఆ పాట కోసం పలువురు స్టార్ హీరోయిన్ల పేర్లను కూడా పరిశీలించామని చెప్పారు.
అయితే చివరకు ఆ పాట కథకు అంతగా సరిపోదని చిత్రబృందం భావించడంతో దాన్ని పూర్తిగా తొలగించినట్లు వెల్లడించారు. ఆ నిర్ణయం తనకు మొదట నిరాశ కలిగించినప్పటికీ, సినిమా కథకు ఏది అవసరమో అదే చేయాలనే ఉద్దేశంతో మేకర్స్ ఆ నిర్ణయం తీసుకున్నారని అన్నారు.
రివ్యూల్లో ‘ఐటెం సాంగ్ కథకు అడ్డుగా మారింది’ అనే విమర్శలు రావొచ్చనే ఆలోచనతోనే ఆ పాటను తీసేయాలని నిర్ణయించుకున్నారని తమన్ తెలిపారు. సరైన కథనం కోసం కొన్ని సందర్భాల్లో ఇలాంటి నిర్ణయాలు తీసుకోవాల్సి వస్తుందని ఆయన పేర్కొన్నారు.
