నటసింహం నందమూరి బాలకృష్ణ ఇటీవల మోకాలికి శస్త్రచికిత్స చేయించుకున్న విషయం తెలిసిందే. వైద్యులు ఆయనకు దాదాపు రెండు నెలల పాటు పూర్తి విశ్రాంతి తీసుకోవాలని సూచించినప్పటికీ, తన సినిమా షూటింగ్ ఆలస్యం కాకుండా చూసేందుకు బాలయ్య కీలక నిర్ణయం తీసుకున్నట్లు సమాచారం.
బాలకృష్ణ ప్రస్తుతం గోపీచంద్ మలినేని దర్శకత్వంలో తెరకెక్కుతున్న తన 111వ చిత్రంలో నటిస్తున్నారు. ఈ సినిమా షూటింగ్ సందర్భంగా జరిగిన యాక్షన్ సీన్‌లో ఆయన మోకాలికి గాయం కావడంతో శస్త్రచికిత్స అవసరమైంది. విజయవంతంగా ఆపరేషన్ పూర్తైన అనంతరం వైద్యులు విశ్రాంతి తీసుకోవాలని సూచించారు.
అయితే, నిర్మాతకు ఎలాంటి ఇబ్బందులు కలగకుండా ఉండాలనే ఉద్దేశంతో బాలయ్య త్వరగా షూటింగ్‌లో పాల్గొనేందుకు సిద్ధమవుతున్నారని టాలీవుడ్ వర్గాల్లో ప్రచారం జరుగుతోంది. సెప్టెంబర్ నెల నుంచే తనకు సంబంధించిన కీలక సన్నివేశాలను పూర్తి చేయాలని ఆయన భావిస్తున్నట్లు తెలుస్తోంది.
అలాగే అక్టోబర్‌లో ప్యాచ్‌వర్క్, నవంబర్‌లో పోస్ట్ ప్రొడక్షన్ పనులు పూర్తి చేసి, డిసెంబర్‌లో సినిమాను ప్రేక్షకుల ముందుకు తీసుకురావాలని చిత్ర బృందం ప్రణాళికలు సిద్ధం చేస్తోందట. దర్శకుడు గోపీచంద్ మలినేని, నిర్మాత వెంకట సతీశ్ కిలారు కూడా అదే లక్ష్యంతో పనులు వేగవంతం చేస్తున్నట్లు సమాచారం.
వృత్తిపట్ల అంకితభావం, నిర్మాతల పట్ల బాధ్యత విషయంలో బాలకృష్ణ ఎప్పుడూ ప్రత్యేకంగా నిలుస్తారని సినీ వర్గాలు చెబుతున్నాయి. ఇప్పుడు కూడా ఆరోగ్య పరిస్థితిని పక్కనబెట్టి షూటింగ్ పూర్తి చేయాలనే ఆయన నిర్ణయం అభిమానులను ఆకట్టుకుంటోంది.
