కన్నడ స్టార్ హీరో యష్ హీరోగా, గీతూ మోహన్దాస్ దర్శకత్వంలో తెరకెక్కిన గ్యాంగ్స్టర్ యాక్షన్ డ్రామా ‘టాక్సిక్’ ఆగస్టు 26న భారీ అంచనాల మధ్య ప్రేక్షకుల ముందుకు వచ్చిన విషయం తెలిసిందే. విడుదలైన తర్వాత సినిమాపై భిన్నాభిప్రాయాలు వ్యక్తమైన నేపథ్యంలో.. తాజాగా గోషామహల్ ఎమ్మెల్యే రాజాసింగ్ కూడా ‘టాక్సిక్’ పై స్పందించారు.
సినిమాలోని కొన్ని సన్నివేశాలపై ఆయన తీవ్ర అభ్యంతరం వ్యక్తం చేశారు. ముఖ్యంగా హింస, అశ్లీలత ఎక్కువగా ఉందంటూ విమర్శించారు. ఈ మేరకు ఓ వీడియో విడుదల చేసిన రాజాసింగ్.. సినీ పరిశ్రమ సమాజంపై ప్రభావం చూపే విధంగా బాధ్యతాయుతమైన సినిమాలు రూపొందించాలని సూచించారు.
‘టాక్సిక్’ సినిమా చూడటానికి తాను థియేటర్కు వెళ్లానని, అయితే సినిమాలోని కొన్ని సన్నివేశాల్లో హింస, అశ్లీలత ఎక్కువగా ఉండటంతో అసౌకర్యంగా అనిపించి మధ్యలోనే బయటకు వచ్చేశానని రాజాసింగ్ తెలిపారు. యష్ వంటి స్టార్ హీరోలు కుటుంబ ప్రేక్షకులు కూడా చూసేలా సినిమాలు చేయాలని ఆయన సూచించారు.
సినిమాల్లో కేవలం హింస, అశ్లీలతకు ప్రాధాన్యత ఇవ్వకుండా.. సమాజానికి ఉపయోగపడే సందేశాలను అందించేలా చిత్రాలను తెరకెక్కించాలని రాజాసింగ్ అభిప్రాయపడ్డారు. ధర్మం, భక్తి, సామాజిక బాధ్యత వంటి అంశాలను ప్రోత్సహించే సినిమాలు రావాల్సిన అవసరం ఉందని పేర్కొన్నారు.
ఈ సందర్భంగా ఇటీవల వచ్చిన ‘ఇరుముడి’, ‘ఛావా’ చిత్రాలను ఆయన ఉదాహరణగా ప్రస్తావించారు. ‘ఇరుముడి’లో ఆధ్యాత్మికత, సామాజిక బాధ్యత వంటి అంశాలు కనిపించాయని, ‘ఛావా’లో ధైర్యం, దేశభక్తి వంటి భావోద్వేగాలు ఉన్నాయని ప్రశంసించారు.
మరోవైపు ‘టాక్సిక్’కు తొలిరోజు మిశ్రమ స్పందన వచ్చినప్పటికీ.. బాక్సాఫీస్ వద్ద మాత్రం సినిమా మంచి వసూళ్లను రాబడుతున్నట్లు ట్రేడ్ వర్గాలు చెబుతున్నాయి. ఈ నేపథ్యంలో రాజాసింగ్ చేసిన వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి.
