కొత్త జీవోతో తెలంగాణలో సినిమా టికెట్ ధరలు, థియేటర్ల వర్గీకరణపై ప్రభుత్వం కీలక నిర్ణయం తీసుకుంది. మారుతున్న సాంకేతికతకు అనుగుణంగా థియేటర్లను కొత్త కేటగిరీలుగా విభజిస్తూ, టికెట్ ధరలకు కనిష్ఠ, గరిష్ఠ పరిమితులను నిర్ణయించింది.
కొత్త నిబంధనల ప్రకారం నాన్-ఏసీ థియేటర్లలో నాన్-ప్రీమియం టికెట్ ధర రూ.30 నుంచి రూ.70 వరకు, ప్రీమియం టికెట్ల ధర రూ.50 నుంచి రూ.100 వరకు ఉండనుంది. ఏసీ థియేటర్లలో నాన్-ప్రీమియం టికెట్లు రూ.50 నుంచి రూ.150 వరకు, ప్రీమియం టికెట్లు రూ.100 నుంచి రూ.200 వరకు నిర్ణయించారు.
డాల్బీ 7.1, 2K, 4K వంటి సదుపాయాలు కలిగిన థియేటర్లను ప్రత్యేక కేటగిరీలోకి తీసుకువచ్చినట్లు సమాచారం. ఈ థియేటర్లకు సాధారణ థియేటర్ల కంటే అధిక టికెట్ ధరలకు అవకాశం కల్పించారు. ప్రత్యేక థియేటర్లలో టికెట్ ధరలు కేటగిరీని బట్టి రూ.100 నుంచి రూ.300 వరకు ఉండే అవకాశం ఉంది.
అలాగే రోజువారీ షోల సంఖ్యను నాలుగు నుంచి ఐదుకు పెంచుతూ ప్రభుత్వం అనుమతి ఇచ్చింది. అదనంగా ఇచ్చే ఐదో షోను చిన్న సినిమాలకు కేటాయించాలనే నిబంధన పెట్టినట్లు తెలుస్తోంది. దీంతో థియేటర్లు దొరకక ఇబ్బందులు పడుతున్న చిన్న చిత్రాలకు కొంత ఊరట లభించే అవకాశం ఉంది.
మరోవైపు సాధారణ ప్రేక్షకులకు సినిమా అందుబాటులో ఉండేలా ప్రతి థియేటర్‌లో కనీసం 25 శాతం సీట్లను నాన్-ప్రీమియం కేటగిరీలో ఉంచాలని ప్రభుత్వం స్పష్టం చేసినట్లు సమాచారం. షో టైమింగ్స్‌ను కూడా ఉదయం 8 గంటల నుంచి రాత్రి 1 గంట వరకు అనుమతించేలా మార్పులు చేసినట్లు తెలుస్తోంది.
రూ.100 కోట్లకు పైగా నిర్మాణ వ్యయం ఉన్న సినిమాలకు ‘సూపర్ హై బడ్జెట్’ హోదా కల్పించే నిబంధన కూడా తీసుకొచ్చారు. ఇలాంటి భారీ చిత్రాలకు టికెట్ ధరల పెంపునకు అనుమతి లభించిన సందర్భంలో, నిబంధనల ప్రకారం వచ్చిన అదనపు లాభాల్లో కొంత మొత్తాన్ని తెలంగాణ ఫిల్మ్ కార్పొరేషన్, ఫిల్మ్ ఫెడరేషన్‌కు జమ చేయాల్సి ఉంటుంది. ఈ నిధులను సినీ కార్మికుల సంక్షేమం, పరిశ్రమ అభివృద్ధి కోసం వినియోగించనున్నారు.
మొత్తంగా కొత్త జీవోతో తెలంగాణలో సినిమా టికెట్ ధరల విధానంలో మార్పులు రావడంతో పాటు, చిన్న సినిమాలకు అదనపు షో ద్వారా మరిన్ని అవకాశాలు లభించనున్నాయి.
