నిన్నటి నుంచి సోషల్ మీడియాలో ఎక్కడ చూసినా ‘విరోష్’ పెళ్లి ఫోటోలే ట్రెండ్ అవుతున్నాయి. టాలీవుడ్ ప్రేక్షకులు ఎంతో ఆసక్తిగా ఎదురుచూసిన విజయ్ దేవరకొండ – రష్మిక మందన్నల వివాహం గురువారం రాజస్థాన్లోని ఉదయ్పూర్లో అత్యంత వైభవంగా జరిగింది. గత కొన్ని సంవత్సరాలుగా వీరిద్దరి ప్రేమపై వస్తున్న వార్తలకు చెక్ పెడుతూ, పూర్తి ప్రైవసీతో ఈ వేడుకను నిర్వహించారు.
ఉదయ్పూర్లోని ప్రసిద్ధ ‘మెమెంటోస్ బై ఐటీసీ హోటల్స్’ వేదికగా జరిగిన ఈ వేడుక రాజసం ఉట్టిపడేలా సాగింది. కుటుంబ సభ్యులు, అత్యంత సన్నిహితులు మాత్రమే హాజరైన ఈ వివాహంలో ఉదయం తెలుగు సంప్రదాయం ప్రకారం పెళ్లి జరిగింది. విజయ్ తెల్లటి పట్టు వస్త్రాల్లో మెరిసిపోగా, రష్మిక బంగారు రంగు పట్టుచీరలో ప్రత్యేక ఆకర్షణగా నిలిచింది. సాయంత్రం సమయంలో రష్మిక పుట్టినగడ్డ కూర్గ్ సంప్రదాయం ప్రకారం మరోసారి వివాహ వేడుక నిర్వహించి తమ మూలాలకు ప్రాధాన్యం ఇచ్చారు.
సోషల్ మీడియాలో 28 మిలియన్ల వ్యూస్
పెళ్లి అనంతరం ఈ జంట ఇన్స్టాగ్రామ్లో షేర్ చేసిన ఫోటోలు ఇంటర్నెట్ను షేక్ చేస్తున్నాయి. విజయ్ దేవరకొండ తన పోస్ట్లో రష్మికను అర్ధాంగిగా పరిచయం చేస్తూ పెట్టిన ఫోటోలకు కేవలం కొన్ని గంటల్లోనే 13 మిలియన్లకు పైగా వ్యూస్ వచ్చాయి. మరోవైపు రష్మిక షేర్ చేసిన పెళ్లి ఫోటోలకు 15 మిలియన్లకు పైగా వ్యూస్ రావడం విశేషం. మొత్తంగా ఇద్దరి పోస్టులకు కలిపి దాదాపు 28 మిలియన్ల వ్యూస్ రావడం సోషల్ మీడియాలో అరుదైన రికార్డుగా మారింది.
అభిమానులు ‘ViRosh’ హ్యాష్ట్యాగ్తో ఈ ఫోటోలను భారీగా షేర్ చేయడంతో, ఎక్స్ (X), ఇన్స్టాగ్రామ్ వంటి ప్లాట్ఫార్మ్లలో ఇవే ట్రెండింగ్లో నిలిచాయి.
ప్రముఖుల శుభాకాంక్షల వెల్లువ
ఈ స్టార్ జంట వివాహానికి సినీ, రాజకీయ వర్గాల నుంచి శుభాకాంక్షలు వెల్లువెత్తాయి. దేశ ప్రధాని నరేంద్ర మోదీ ప్రత్యేకంగా సందేశం పంపి నూతన వధూవరులను ఆశీర్వదించడం విశేషంగా మారింది. అలాగే మెగాస్టార్ చిరంజీవి, మహేష్ బాబు, అల్లు అర్జున్ వంటి పలువురు ప్రముఖులు సోషల్ మీడియా ద్వారా శుభాకాంక్షలు తెలియజేశారు.
ఉదయ్పూర్లో వివాహ వేడుకలు ముగించుకున్న ఈ జంట త్వరలో హైదరాబాద్కు చేరుకోనున్నారు. మార్చి 4న హైదరాబాద్లోని తాజ్ కృష్ణా హోటల్లో టాలీవుడ్, బాలీవుడ్ ప్రముఖుల కోసం గ్రాండ్ రిసెప్షన్ ఏర్పాటు చేసినట్లు సమాచారం.
‘గీత గోవిందం’ సినిమా నుంచి మొదలైన విజయ్–రష్మిక ప్రయాణం ఇప్పుడు పెళ్లి పీటల వరకు చేరడంతో అభిమానులు ఆనందం వ్యక్తం చేస్తున్నారు. ప్రస్తుతం ఈ పెళ్లి ఫోటోలు నెట్టింట హాట్ టాపిక్గా మారాయి.
