ఐకాన్ స్టార్ అల్లు అర్జున్ వరుస పాన్ ఇండియా ప్రాజెక్ట్లతో ఫుల్ బిజీగా ఉన్నారు. ప్రస్తుతం అట్లీ దర్శకత్వంలో తెరకెక్కుతున్న ‘రాకా’ చిత్రంలో నటిస్తున్న ఆయన, ఆ సినిమా పూర్తయ్యాక దర్శకుడు లోకేష్ కనగరాజ్ కాంబినేషన్లో తన 23వ చిత్రాన్ని ప్రారంభించనున్నారు. ప్రస్తుతం ‘AA23’ వర్కింగ్ టైటిల్తో ప్రీ-ప్రొడక్షన్ పనులు జరుగుతున్న ఈ చిత్రాన్ని మైత్రీ మూవీ మేకర్స్ అత్యంత ప్రతిష్టాత్మకంగా నిర్మిస్తోంది. ఈ భారీ యాక్షన్ ఎంటర్టైనర్కు అనిరుధ్ రవిచందర్ సంగీతం అందిస్తుండగా, విదేశీ లొకేషన్లు, భారీ సెట్లలో చిత్రీకరణ జరపాలని మేకర్స్ ప్లాన్ చేస్తున్నట్లు సమాచారం. కథ మొత్తం హై-వోల్టేజ్ యాక్షన్, ఇంటెన్స్ కాన్ఫ్లిక్ట్ చుట్టూనే తిరుగుతుందని, ఇందులో యాక్షన్ ఎపిసోడ్స్కే ఎక్కువ ప్రాధాన్యత ఉంటుందని టాక్ వినిపిస్తోంది.
ఇదిలా ఉండగా, ఈ సినిమాకు సంబంధించిన మరో ఆసక్తికర వార్త సోషల్ మీడియాలో వైరల్ అవుతోంది. తాజా సమాచారం ప్రకారం, అల్లు అర్జున్కు ధీటుగా నిలిచే విలన్ పాత్ర కోసం బాలీవుడ్ స్టార్ షాహిద్ కపూర్ పేరును పరిశీలిస్తున్నట్లు ఇండస్ట్రీ వర్గాల్లో ప్రచారం జరుగుతోంది. లోకేష్ కనగరాజ్ సినిమాల్లో విలన్ పాత్రలకు ప్రత్యేక ప్రాధాన్యత ఉంటుంది. ఈసారి కూడా హీరోతో సమానంగా పోటీపడే పవర్ఫుల్ నెగెటివ్ క్యారెక్టర్ను ఆయన డిజైన్ చేసినట్లు సమాచారం. అలాంటి పాత్రలో షాహిద్ కపూర్ కనిపిస్తే సినిమా స్థాయి మరో లెవల్కు చేరుతుందనే అభిప్రాయం అభిమానుల్లో వ్యక్తమవుతోంది.
‘కబీర్ సింగ్’, ‘ఫర్జీ’ వంటి ప్రాజెక్ట్లతో తన నటనకు మంచి గుర్తింపు తెచ్చుకున్న షాహిద్ కపూర్, అల్లు అర్జున్తో స్క్రీన్ను పంచుకుంటే హై-వోల్టేజ్ యాక్షన్ సన్నివేశాలు, మైండ్ గేమ్స్ ప్రేక్షకులకు ప్రత్యేక ఆకర్షణగా నిలిచే అవకాశం ఉందని సినీ వర్గాలు భావిస్తున్నాయి. అయితే, షాహిద్ కపూర్ ఈ ప్రాజెక్ట్లో నటిస్తున్నారనే విషయంపై చిత్రబృందం నుంచి ఇప్పటివరకు ఎలాంటి అధికారిక ప్రకటన వెలువడలేదు. ప్రస్తుతం ఈ వార్త సోషల్ మీడియాలో వైరల్ అవుతూ అభిమానుల్లో ఆసక్తిని పెంచుతోంది.
