హైదరాబాదీ బిర్యానీ మరోసారి ప్రపంచవ్యాప్తంగా తన ప్రత్యేకతను చాటుకుంది. టేస్ట్ అట్లాస్ (TasteAtlas) విడుదల చేసిన ‘World’s Best Rice Dishes 2025’ జాబితాలో హైదరాబాదీ బిర్యానీ 10వ స్థానం దక్కించుకుంది. ప్రపంచ రైస్ వంటకాలలో టాప్ 10లో చోటు దక్కించుకున్నది ఇదే ఒక భారతీయ వంటకం కావడం విశేషం.
చెఫ్లు, ఫుడ్ క్రిటిక్స్తో పాటు ప్రపంచవ్యాప్తంగా ఉన్న యాత్రికులు ఇచ్చిన రేటింగ్స్ ఆధారంగా ఈ ర్యాంక్ నిర్ణయించబడింది. ఇది హైదరాబాదీ బిర్యానీకి ఉన్న అంతర్జాతీయ క్రేజ్ను మరోసారి నిరూపించింది.
టాప్ టెన్ లిస్ట్లో ఎక్కువగా జపనీస్ రైస్ డిష్లు చోటు దక్కించుకున్నాయి. మొదటి మూడు స్థానాలు వరుసగా నెగిటోరోడోన్, సుషీ, కైసెన్డోన్ దక్కించుకున్నాయి.
భారతదేశంలో లక్నో, కోల్కతా, కశ్మీరీ స్టైల్స్ వంటి అనేక ప్రసిద్ధ బిర్యానీలు ఉన్నప్పటికీ, హైదరాబాదీ బిర్యానీ మాత్రమే ప్రపంచస్థాయి టాప్-10లో నిలవడం గర్వకారణం.
అలాగే టాప్ 50లో బిర్యానీ అనే పేరుతో నిలిచిన మరొక వంటకం ఇరాన్ బిర్యానీ కావడం కూడా ఆసక్తికరం.
దేశవ్యాప్తంగా అనేక ప్రాంతాల్లో బిర్యానీలు వండినా, హైదరాబాదీ బిర్యానీ మాత్రం తన ప్రత్యేకతతో అందర్నీ ఆకట్టుకుంటుంది. ఇందులో రెండు ప్రధాన విధానాలు ఉన్నాయి:
కచ్చి బిర్యానీ
మాంసం మరియు బియ్యాన్ని మసాలాలతో కలిపి ఒకేసారి వండటం దీని ముఖ్యమైన ప్రత్యేకత. ఇదే అసలైన హైదరాబాదీ రుచి ఎందుకంటే, మసాలా, మాంసం, బియ్యం పరిపూర్ణంగా కలుస్తాయి.
పక్కి బిర్యానీ
మాంసం మరియు బియ్యాన్ని ముందుగా వేర్వేరుగా ఉడికించి, తరువాత పొరలుగా అమర్చి దమ్ మీద వండటం. దీన్ని తక్కువ సమయంలో సిద్ధం చేయవచ్చు, కానీ రుచి మాత్రం మృదువుగా, సువాసనగా ఉంటుంది.
ఈ రెండు విధానాలు కూడా బిర్యానీకి అసలు మజా, ప్రత్యేకమైన అరోమా ఇస్తాయి.
హైదరాబాద్ బిర్యానీ పుట్టుక నిజాం నవాబుల వంటశాలల్లో జరిగింది. ఇది మౌలికంగా మొఘలాయ్ + డెక్కన్ వంటకాల మిశ్రమం.
“బిర్యానీ” అనే పదం పెర్షియన్ భాషలోని ‘బిరియన్’ (వేపడం/కాల్చడం) నుంచి వచ్చింది. మొఘల్ చక్రవర్తి ఔరంగజేబు కాలంలో ఈ వంటకం డెక్కన్ ప్రాంతంలో విస్తరించి, తరువాత హైదరాబాదు దీన్ని తనదైన స్టైల్లో మార్చుకొని ప్రపంచవ్యాప్తంగా ప్రసిద్ధి పొందింది.
