టాలీవుడ్లో మల్టీస్టారర్ సినిమాల హవా రోజురోజుకూ పెరుగుతోంది. స్టార్ హీరోలు కలిసి నటించే చిత్రాలపై ప్రేక్షకుల్లో ఎప్పుడూ ప్రత్యేక ఆసక్తి ఉంటుంది. ఈ నేపథ్యంలో మాస్ మహారాజా రవితేజ, విలక్షణ నటుడు శ్రీవిష్ణు కాంబినేషన్లో ఓ క్రేజీ మల్టీస్టారర్ తెరకెక్కబోతుందనే వార్తలు సోషల్ మీడియాలో వైరల్ అవుతున్నాయి. రవితేజ మాస్ ఎనర్జీ, శ్రీవిష్ణు నేచురల్ కామెడీ టైమింగ్ కలిస్తే ప్రేక్షకులకు పూర్తి స్థాయి వినోదం అందుతుందని అభిమానులు అభిప్రాయపడుతున్నారు. దీంతో ఈ కాంబినేషన్పై ఇప్పటికే మంచి బజ్ ఏర్పడింది.
సినీ వర్గాల్లో వినిపిస్తున్న సమాచారం ప్రకారం.. రాజ రాజ చోర, శ్వాగ్ చిత్రాల దర్శకుడు హసిత్ గోలి ఈ చిత్రానికి దర్శకత్వం వహించే అవకాశం ఉందని టాక్. అలాగే ప్రముఖ నిర్మాత దిల్ రాజు తన శ్రీ వెంకటేశ్వర క్రియేషన్స్ బ్యానర్పై ఈ ప్రాజెక్ట్ను నిర్మించనున్నట్లు ప్రచారం జరుగుతోంది. ప్రస్తుతం ఈ సినిమాకు సంబంధించిన ప్రీ-ప్రొడక్షన్ పనులు కొనసాగుతున్నాయని, కథను పూర్తి స్థాయిలో సిద్ధం చేసిన తర్వాత త్వరలోనే షూటింగ్ ప్రారంభించేలా చిత్రబృందం ప్రణాళికలు సిద్ధం చేస్తోందని సమాచారం.
అలాగే ఈ చిత్రాన్ని సంక్రాంతి 2027 సందర్భంగా ప్రేక్షకుల ముందుకు తీసుకురావాలనే లక్ష్యంతో మేకర్స్ ప్లాన్ చేస్తున్నట్లు సినీ వర్గాల్లో ప్రచారం జరుగుతోంది. అయితే ఈ ప్రాజెక్ట్కు సంబంధించిన అధికారిక ప్రకటన ఇంకా వెలువడాల్సి ఉంది. అయినప్పటికీ రవితేజ – శ్రీవిష్ణు కాంబినేషన్ వార్తలు సోషల్ మీడియాలో వైరల్ అవుతూ అభిమానుల్లో భారీ అంచనాలు పెంచుతున్నాయి.
