దేశ రాజధాని ఢిల్లీలోని రాష్ట్రపతి భవన్లో పద్మ పురస్కారాల ప్రదానోత్సవ కార్యక్రమం ఘనంగా నిర్వహించబడింది. వివిధ రంగాల్లో విశేష సేవలు అందించిన ప్రముఖులకు భారత రాష్ట్రపతి ద్రౌపది ముర్ము దేశ అత్యున్నత పౌర పురస్కారాలను ప్రదానం చేశారు. పద్మ అవార్డుల రెండో విడత ప్రదానోత్సవంలో భాగంగా మంగళవారం మొత్తం 47 మంది ప్రముఖులకు పద్మశ్రీ అవార్డులు అందజేశారు. అంతకుముందు జరిగిన తొలి విడత కార్యక్రమంలో 66 మంది అవార్డులను స్వీకరించారు.
ఈ సందర్భంగా తెలుగు సినీ పరిశ్రమకు చెందిన ప్రముఖ నటులు, నిర్మాతలు రాజేంద్రప్రసాద్ మరియు మురళీమోహన్ రాష్ట్రపతి చేతుల మీదుగా పద్మశ్రీ పురస్కారాలను అందుకున్నారు. కళారంగానికి వారు అందించిన విశిష్ట సేవలకు గుర్తింపుగా కేంద్ర ప్రభుత్వం ఈ గౌరవాన్ని ప్రకటించింది. అవార్డు స్వీకరణ సమయంలో సభా ప్రాంగణం చప్పట్లతో మారుమోగింది. తెలుగు సినీ అభిమానులు, సినీ ప్రముఖులు ఇద్దరికీ శుభాకాంక్షలు తెలియజేస్తున్నారు.
అలాగే మలయాళ సినీ పరిశ్రమకు చెందిన ప్రముఖ నటుడు మమ్ముట్టి కూడా పద్మ భూషణ్ పురస్కారాన్ని అందుకున్నారు. ఈ కార్యక్రమంలో ప్రధానమంత్రి నరేంద్ర మోదీ, కేంద్ర మంత్రులు, పలువురు ప్రముఖులు పాల్గొన్నారు. ప్రస్తుతం పద్మశ్రీ అవార్డులు అందుకున్న సినీ ప్రముఖులకు సోషల్ మీడియాలో శుభాకాంక్షలు వెల్లువెత్తుతున్నాయి.
