అక్కినేని అఖిల్ హీరోగా, భాగ్యశ్రీ బోర్సే హీరోయిన్గా నటిస్తున్న భారీ చిత్రం లెనిన్. మురళీ కిషోర్ అబ్బూరు దర్శకత్వంలో తెరకెక్కుతున్న ఈ పీరియాడిక్ యాక్షన్ డ్రామాపై ఇప్పటికే ప్రేక్షకుల్లో మంచి అంచనాలు నెలకొన్నాయి. అన్నపూర్ణ స్టూడియోస్, సితార ఎంటర్టైన్మెంట్స్, మనం ఎంటర్ప్రైజెస్ సంయుక్తంగా ఈ చిత్రాన్ని నిర్మిస్తున్నాయి.
పలు కారణాలతో వాయిదా పడిన ఈ సినిమా ఎట్టకేలకు జూలై 10న ప్రేక్షకుల ముందుకు రానుంది. ఈ నేపథ్యంలో సినిమా ప్రమోషన్స్లో భాగంగా అఖిల్ వరుస ఇంటర్వ్యూల్లో పాల్గొంటున్నారు. తాజాగా యాంకర్ సుమతో జరిగిన ఇంటర్వ్యూలో అఖిల్ మాట్లాడుతూ.. లెనిన్ విడుదల కోసం ఎంతో ఆసక్తిగా ఎదురుచూస్తున్నానని తెలిపారు. ప్రస్తుతం తనపై తీవ్ర ఒత్తిడి ఉందని, సినిమా రిలీజ్ దగ్గరపడుతున్న కొద్దీ టెన్షన్ కూడా పెరుగుతోందని ఓపెన్గా చెప్పారు.
ఈ ప్రాజెక్ట్ కోసం ఎంతో కష్టపడ్డానని.. తన కెరీర్లోనే అత్యుత్తమ ప్రదర్శన ఇవ్వడానికి శక్తివంచన లేకుండా శ్రమించానని అఖిల్ వెల్లడించారు. ప్రేక్షకులు తన కష్టాన్ని గుర్తించి సినిమాను ఆదరిస్తారనే నమ్మకం వ్యక్తం చేశారు. గతంలో వచ్చిన కొన్ని సినిమాలు ఆశించిన ఫలితాలను అందుకోకపోవడంతో.. లెనిన్ విజయం తన కెరీర్కు ఎంతో కీలకమని సినీ వర్గాలు భావిస్తున్నాయి. ఈ సినిమాతో అఖిల్ కొత్త ఇమేజ్ను సొంతం చేసుకునే అవకాశాలు ఉన్నాయని అభిమానులు ఆశిస్తున్నారు.
ముఖ్యంగా ఇప్పటివరకు స్టైలిష్, రొమాంటిక్ పాత్రల్లో కనిపించిన అఖిల్.. ఈ సినిమాలో పూర్తిగా భిన్నమైన మాస్, రస్టిక్ లుక్లో కనిపించబోతున్నారు. పల్లెటూరి నేపథ్యంలో సాగే ఈ పాత్ర ఆయన కెరీర్లో కొత్త మలుపు తీసుకురానుందనే అంచనాలు ఉన్నాయి. లెనిన్ అఖిల్ కెరీర్లో మైలురాయిగా నిలుస్తుందా లేదా అన్నది జూలై 10న తేలనుంది.
